Имрӯз бахшида ба фарорасии ҷашни бузурги 30 –солагии Истиқлолияти Ҷумҳурии Тоҷикистон дар ҶСК “Тавҳидбонк” бо иштироки Роҳбарият ва кормандони бонк ҷамъомад баргузор гардид. Чорабиниро Раиси Раёсати бонк муҳтарам Зардов Ш. Д. оғоз намуда, зимни суханронӣ ва табрикоти худ чунин гуфтанд: “Банда Истиқлолро аз он хотир дӯст медорам, ки озодиро сахт дӯст медорам. Истиқлолҳо гуногунанд: Истиқлоли давлатӣ, сиёсӣ, иқтисодӣ, маънавӣ, фикрӣ ва ғайраҳо. Аммо Истиқлоли давлатӣ ва сиёсӣ сари ҳама дигар истиқлолҳост. Бе ин навъи Истиқлол дигар ҳама истиқлолҳо номумкин ва мушкил мегардад. Давлати соҳибистиқлол доштан бахту саодати миллат аст. Ҳар он миллате, ки соҳибистиқлол нест, озод нест ва бедавлат аст. Шукрона аз он Зоти пок мекунем, ки ба мо ҳам давлат дода, ҳам истиқлол ва ҳам Сарвари олӣ. Мо бояд ба қадри давлатдорӣ, истиқлолияти миллӣ, Роҳбари соҳибхирад ҳамагӣ бирасем ва аз ин доштаҳо шукр кунем.” Дар охир кормандони фаъол аз ҷониби Раиси Раёсати Бонк бо Ифтихорномаҳо қадрдонӣ гардиданд.